|
gelibde rose
i muasde
en misdkiwö haun
weusd
fawöggd bisd
a gaunze wochn
hosd ghoedn
is e schen
owa
en meina dumheid
howema eibüdd
es dauad
mindesdens ewech
gelibde rose
so lad
oess ma duad
i muasde fasenkn
da misdkiwö
kennd kein
eabarmen
*
riwisl
riwisl
riwisl
hede gean
ogrosl
ogrosl
ogrosl
mogened
*
|
Biografie
waune schdiab
wase ned
wo i schdiab
wase ned
wia i schdiab
wase ned
wos mi eigrom wean
wase a ned
wos aum baddazedl
schden wiad
kaune
nimamea lesn
owa dase
mei eigene leich
nima zoen muas
do gfreirame
heit schon drauf
heit schon drauf
wia a noggada
*
|
|
ösdareicha
noch 18
soziobussla
bfoarafressa
noch 34
sozifressa
bfoaraobussla
noch 38
naziobussla
judnfressa
noch 45
judnobussla
nazifressa
noch 55
ewech neutral
ewech
ewech
a schdingada kas
*
|
an möada
waunsd faunga wüsd
muasd woatn
bisase schaumd
waunse
a möada schaumd
daun geda
en baak
und legdse
middn auf dwisn
ens gros
und faungd au
zum wana
und daun
wanda und wand
biss de rengwiam
aus da ead
aussawaggd
daun gesd hi
und faungsd eam
wia an schnegg
en solod
*
|
